Rhan 3c. Cyd-gynhyrchu strategol

Gwerthfawrogi’r holl gyfranogwyr, a magu eu cryfderau

• Rydych yn dangos eich bod yn gwerthfawrogi cyfraniad pob un, ac yn sicrhau bod llais pob un yn cael ei glywed.
• Er enghraifft, rydych yn sicrhau eich bod yn rhoi’r cymorth y mae ei angen ar eich defnyddwyr gwasanaethau a’ch gofalwyr sy’n cyd-gynhyrchu, er mwyn chwarae rhan lawn; mae gennych reolau sylfaenol ac rydych yn tynnu sylw at ymddygiadau nad ydynt yn parchu neu’n gwerthfawrogi eu presenoldeb a’u cyfraniad.

Datblygu rhwydweithiau ar draws seilos

• Rydych yn defnyddio rhwydweithiau i ysgogi newidiadau cadarnhaol.
• Mae cysylltu gweithwyr proffesiynol â defnyddwyr gwasanaethau a gofalwyr yn creu cyd-ddealltwriaeth, mwy o fewnwelediad, ac arloesi. Gallech sefydlu grwpiau defnyddwyr gwasanaethau  a gofalwyr er mwyn meithrin y cysylltiadau hyn yn barhaus.

Gwneud yr hyn sy’n bwysig i’r bobl sy’n cyfranogi

• Mae eich systemau monitro a gwerthuso yn cynnwys mesur y canlyniadau da fel y diffinnir gan eich defnyddwyr gwasanaethau, cleifion a gofalwyr; ac maen nhw’n rhan o’r broses.

Meithrin cysylltiadau a seilir ar ffydd a rhannu pŵer

• Rydych yn sicrhau bod eich dulliau gweithredu, eich systemau a’ch strwythurau yn galluogi pobl i feithrin cysylltiadau ac ymddiriedaeth ac yn eu hannog i wneud hynny, ac yn arwain at ddod i benderfyniadau ar y cyd.

Galluogi pobl i ysgogi newid

• Rydych yn gweithio mewn partneriaeth â’r defnyddwyr gwasanaethau a gofalwyr yr ydych yn eu cefnogi, i gyd-gomisiynu, cyd-ddylunio, cyd-gyflwyno a chyd-werthuso eich gwasanaethau. Er enghraifft, maen nhw’n rhan o fyrddau a grwpiau llywio.

Nid yw newid ar lefel strategol yn digwydd dros nos, ond byddwch yn effro i’r arwyddion cyd-gynhyrchu y gallwch eu meithrin a’u datblygu. Mae cyd-gynhyrchu strategol yn creu fframweithiau sy’n galluogi mwy o gyd-gynhyrchu fel grŵp ac fel unigolion i ddigwydd, yn hytrach na bod ymarferwyr yn gorfod dod o hyd i ffyrdd o gyd-gynhyrchu er gwaethaf  y system y maent yn gweithredu ynddi.