Cyd-gynhyrchu â gofalwyr di-dâl mewn lleoliadau iechyd
CymraegEnglish
Pecyn cymorth cyd-gynhyrchu i weithwyr proffesiynol sy’n gweithio yn y sector iechyd a gyda’r sector iechyd.
Lawr lwythwch y pecyn cyfan ar ffurf pdf
Mae’r pecyn cymorth hwn ar gael yn Gymraeg ac yn Saesneg (gallwch newid o’r naill i’r llall gan ddefnyddio’r botwm iaith uchod). Mae’r awgrymiadau ar gyfer dilyn ymlaen / darllen pellach yn mynd at gynnwys sydd y tu allan i'r pecyn cymorth. Lle bo’r cynnwys hwn ar gael yn ddwyieithog bydd y ddolen yn mynd â chi at yr iaith briodol. Lle bo’r cynnwys allanol ar gael mewn un iaith yn unig, nodir hynny.
Wrth gyd-gynhyrchu, mae gweithwyr proffesiynol yn dod at ei gilydd, ynghyd â defnyddwyr gwasanaethau a gofalwyr di-dâl, er mwyn cyfuno eu profiadau proffesiynol a’u profiadau bywyd, a dylunio atebion sy’n gwella gwasanaethau a chymunedau. Wrth gynnwys pobl i gyd-gynhyrchu mae yna fuddion amlwg iawn i ddefnyddwyr gwasanaethau a gofalwyr, ac i’r timau proffesiynol sy’n eu cefnogi.
Yng Nghymru, mae’r Ddeddf Gwasanaethau Cymdeithasol a Llesiant, Deddf Llesiant Cenedlaethau’r Dyfodol, a Deddf Iechyd a Gofal Cymdeithasol (Ansawdd ac Ymgysylltu), ynghyd â’r rhaglen lywodraethu a chynllun y llywodraeth ar gyfer iechyd a gofal cymdeithasol, oll yn gosod dyletswydd ar gyrff a byrddau cyhoeddus i gynnwys llais dinasyddion wrth ddylunio gwasanaethau a’u cyflwyno.
Mae yna ffocws cynyddol ar gyd-gynhyrchu trwy ddeddfwriaeth a dyletswyddau statudol. Serch hynny, rydym yn gwybod bod cyd-gynhyrchu yn teimlo fel rhywbeth amwys a pheryglus i lawer, ac adeg ysgrifennu’r geiriau hyn nid yw’n cael ei ddefnyddio’n ddigonol – yn enwedig yn y sector iechyd sy’n ffocws ar gyfer y rhaglen Ymwybodol o Ofalwyr.
Yn ganlyniad, mae gwasanaethau yn dal i geisio bodloni galw cynyddol gyda llai o gyllideb, ac mae hyn yn arwain at heriau staffio, oedi wrth ddarparu cymorth, a chulhau’r meini prawf cymhwystra er mwyn canolbwyntio ar yr anghenion mwyaf difrifol a dybryd. Byddai cyd-gynhyrchu yn gymorth iddynt i rannu adnoddau a’u defnyddio’n well, lleihau dyblygu a gwastraff, a manteisio i’r eithaf ar asedau ac adnoddau cleifion, defnyddwyr gwasanaethau a gofalwyr – gan arwain at wasanaethau sy’n canolbwyntio ar unigolion, canlyniadau gwell a llai o alw am wasanaethau, trwy atal.
Rydym wedi llunio’r pecyn cymorth hwn er mwyn cefnogi gweithwyr gofal iechyd proffesiynol ar eu siwrnai cyd-gynhyrchu, ynghyd â’u cydweithwyr mewn mudiadau statudol eraill, partneriaid yn y trydydd sector a defnyddwyr gwasanaethau a gofalwyr sy’n teithio ar hyd y llwybr cyd-gynhyrchu gyda nhw.
Ein bwriad yw egluro’r cysyniad, cynnig enghreifftiau o arfer a fydd yn ysbrydoli ac yn dangos beth sy’n bosibl, a chynnig cyfres o offerynnau a chamau meddwl y gellir tynnu arnynt ar hyd y daith..
